預計乘坐07:48由金谷站開出的大井川鐵道大井川本線，一早到達 JR 金谷站沿指示經過隧道到對面月台，找到乘換口先買張寸又峽周遊券，這 pass 可乘坐大井川本線(金谷往來千頭)及井川線(千頭往來奧泉)再加千頭或奧泉往來寸又峽溫泉的巴士，計過數 pass 比散買只便宜四百幾円但可省卻每次購票時間，而行程會到奧大井湖上，車站職員告之到井川線購買就可。
列車開出後不時見到茶田，而這是大井川本線當然唔少得大井川。
大井川鐵道往來新金谷至千頭的蒸汽火車是很多遊客乘坐的，只是我沒太大興趣及班次配合不到行程就坐普通列車。到了千頭站走過另一月台乘坐井川線，列車車廂細細車卡不可互通的，隨意上了一卡車廂先跟車長買好奧泉至奧大井湖上的車票。
列車駛到巿代站時為了配合下一站長島水壩站之間的坡幅，會有架 Abt系統車過來跟列車接合推進，這段路軌中間亦多了排齒軌，車長通知會停五分鐘，這時好多乘客落車拍照。而到了長島水壩站亦會停留幾分鐘等那 Abt系統車分體。
10:17到達奧大井湖上站，要到眺望奧大井湖上站位置便先走過湖上鐵橋，在橋上從火車軌那邊望向下是望穿見到湖面的，唔知點解超級畏高的我完全冇問題，但阿蘇就 - 個心離一離呀！
過了橋就是些鐵樓梯，行上去樓梯越來越直阿蘇開始頂唔順，只好佢停低由我繼續上，過了樓梯到了樹林一路行上到一條馬路便到眺望奧大井湖上站的地方，拍些照後快快趣走番轉頭，回到車站距離11:04開出的列車還有15分鐘，餘下行程開始時間充裕，而原本以為這裡是無人車站這時有職員售票的。
到奧泉站轉寸又峽溫泉巴士，12:40到達後找地方食午飯，先到一間只有烏冬蕎麥麵唔太啱便找另一間，見餐牌有定食兩個字就唔理係乜就指(諗住指乜就食乜)，指完後老闆娘講了些日文做了些手勢似乎溝通唔到，我不斷在餐牌上指唔同項目老闆娘就不斷講日文做手勢，最後老闆娘走去賣手信冇理我地，見唔對路跟阿蘇回到烏冬蕎麥麵店。
食完麵沿路牌指示行去夢之吊橋，約半個鐘到了一個可遠望吊橋的地方。
這裡要繼續前行到夢之吊橋便先要經過一段約三四層樓高的樓梯，阿蘇見到就唔願行，而我本著唔行唔知身體好的精神就由我行，落左樓梯有段幾平坦的路前行一陣便到夢之吊橋，唔打算亦都唔敢過橋的我在橋口睇睇便沿路回去。
回到路口見有個草履石公園有幾棵楓樹有些少變紅便進去睇陣。
坐16:00巴士回千頭轉大井川本線回金谷再轉 JR ，約七點回到靜岡。晚上經靜岡站北口過到一條幾多食店的街道，找了間火鍋放題，這裡的肉切得好薄淥下就熟，再加飲酒放題，有好多唔同酒類選擇，收費男女不同價的。
留言列表
