食過早餐到現代百貨10樓退稅櫃位，試試可否完成昨日樂天超市的退稅，上到去原來需要登記信用咭，冇帶在身便暫時作罷。
之後出發去駱山公園，搭地鐵到惠化站2號出口直行經過藝術劇場和公園，到 GS25 便利店左轉(沿路有指示的)不久就見貓壁畫，再前行開始是斜路，越近公園路就越斜，進入公園到觀景點又要行斜路。
行到見城郭開始到觀景點，沿城郭行到最高點。
離開駱山公園便到梨花壁畫村，壁畫上不時見有遊人提字，而身上只有原子筆的我亦提番份。
回到大街向東大門方向行，邊行邊搵地方食飯，經過條橫街被一間小店外的海報吸引，入到去用手勢溝通過兩位便坐低，之後食店大姐冇問我地食乜就走進廚房忙著，見唔多對路之時又有兩人進店，阿蘇問好唔好我地走人等這兩人代替我倆的食物，我諗可能有驚喜決定留低。
結果驚喜欠奉(早知聽阿蘇講走人啦)，來到的是份湯，有韮菜豬肉豬內臟，淡淡沒甚味道，還好有些醬料和白飯，本著：好又一餐，唔好又一餐 的我開始進食。
食食下見有幾隻綠色辣椒，想起網上所講這種辣椒唔辣，這時誤信網上傳聞加上唔知口痕定手痕的我隨手拎起隻放入口咬啖，結果就出事，一生食過最辣就這次，掙扎左十分鐘搵枝啤酒救救火。
食完飯沿大街行陣到東大門站搭地鐵。
地鐵到安國站3號出口先到北村文化中心，拿份地圖坐坐研究路線，唔知係唔係上午行得斜路多，這時跟阿蘇有點散散地氣力不繼，先休息陣才繼續出發。
今日是韓國公眾假期周圍好多人，到處是人又好多斜路。
到了一處像觀景點然後在附近找到條樓梯走落三清洞路，假期關係又係好多人，一路行陣坐陣。
首爾街頭最好的就是種滿銀杏樹，一路上還見些結了果。
走到附近見大毛筆便是仁寺洞，這日假期這裡又是人頭湧湧，入到去不時見有些書畫，工藝，仿古店舖。
再前行見有點肚餓先食點東西，買了小食但有些內臟，唔合口味食了點就算。
沿路前行所見，這裡為配合韓國傳統，所有店舖需用韓文招牌，如有英文要放細在旁。
走過仁寺洞附近就是清溪川其中一段，走落去行行，傳聞溪邊會凍幾度，親身感受過是真的。
晚上回到酒店在房間拍咭但沒反應開唔到門，最後要找技工幫手，技工一來不問何事用佢的萬能咭開了隔離房門，最後還是換咭。之後帶好信用咭到現代百貨10樓，職員辦過手續交過現金，告知離境時要到機場某個櫃位蓋印或檢查行李，否則會在信用咭扣數再加罰款。
出外食晚飯，新村一帶有各樣食店，只是選擇越多，決定越難，最後經過一家給易拉架相片吸引，入到去原來每份食物要每人一份即兩份，阿蘇開頭話走但我又唔走(又唔聽阿蘇話)，有點唔順氣只要了兩份炒飯就算了。
留言列表
