一朝早見到出面落大雨，心想旅程會否泡湯呢?
九點幾落去食早餐，餐廳食物唔算好味，但能飽肚就可以了。
食完早餐返上房間見到雨停了，便打俾昨日的司機，原來佢已經在
酒店的士站，跟阿蘇退房後上車。
上到車告知司機要去赤坎古鎮，馬降龍和錦江里，問佢要收幾錢佢話四百，心諗貴喎，比我心目中預算貴左百零蚊，有冇搵我老襯呢? 但見佢服務態度唔錯就算了。
行左冇耐便到赤坎，到處都是好舊的騎樓屋，司機話而家唔係太多人願意住呢度，眼前所見又的確幾陳舊。
到了一般遊客遊覽的騎樓街落車，一睇這裡的確有點味道。
這條街街頭有一小段用作招呼遊客的，有賣小食，記念品等攤檔。
赤坎本身有三百多年歷史，建築物則是和大部份碉樓一樣在二十世紀初由華僑出資興建的，但這裡的建築設計沒有碉樓那種堡壘般的防御性。
這裡還有個影視城，拍過很多劇集和電影，今天有劇在拍攝不能進入參觀。
行左陣就行晒，返轉頭沿路所見都是些舊事物，保育真的唔容易，這條騎樓街雖然短，但相當精彩。
下一站去馬降龍，這裡由黃氏和關氏家族共五條村組成。
入去不久便被樹林包圍，還好沿路指示尚算清楚，一路蟬鳴不絕，還迴立體聲一樣。
有些碉樓可以上去睇的但又是不准拍照的，也就上去睇睇。
上到去跟其他遊人好像睇示範單位咁，同時又見國內遊人隨意拍照，那我又唔客氣跟隨其他人不守規則。
這裡範圍都幾大加上中途有些路被雨水浸了要兜路行，超過一個鐘先出番去，這時我跟阿蘇已經身水身汗。
最後去錦江里，之前一日在自力村買聯票九十蚊只包括馬降龍，到錦江里又要再買門票三十蚊，其實錦江里只有三座碉樓，但其中一座瑞石樓是當年香港人出資回鄉興建的，算得上是碉樓中的天匯。
一去到先去升峰樓，入到去沒有不准拍照或甚麼的，很好，在香港求其去一個公園都閒閒地地有十種八種不准。
去到瑞石樓門口有人守住要收廿五蚊先可以上去，聽佢講呢度有九層就放棄上去，一般碉樓只有五/六層，瑞石樓特別巴閉有九層，但見佢門口有張相可以影晒三座碉樓，便問佢在那裡可以咁影，佢大喝一聲叫了位大姐帶我倆去佢間屋天台影，收十蚊位的，開平碉樓不只是世界文化遺產，同時是阿爺給後人的寶貴身家。
回到酒店約兩點幾，坐陣去餐廳食下午茶。
點了三文治，多春魚，魷魚．．．好熱氣的一餐。
三點幾打車到客運站坐車回羅湖
留言列表
