趁住五月有個長週末，跟阿蘇來個兩日一夜遊，兩日一夜可以去的地方唔多，倉卒地決定去-開平。
冇乜做功課下諗住去到先算，21號一早八點去到太子諗住搭八點四十分班車，告知冇位要搭一點五十分，轉身跑出彌敦道坐上238X直奔中港城。
八點二十分到達中港城，到售票櫃位查詢航班資訊，得知最快是九點半到珠海但只有頭等票，去江門要下午先有船，這時身後有位黃牛阿嬸不停叫兩百蚊，我問佢兩百蚊兩張? 佢有點冇我咁好氣回答：一張呀。
失心瘋的我對住售票處係咁問：去呢度幾點，去果度又幾點呀? 去唔到珠海咁去江門又點呀(問完又問)．．．咁又點點點呀?
票務員問：先生，其實你目的地係邊? 去開平可以用海陸聯運，俾張換票卷你到九州港客運站換張正式車票就可。
繼續失心瘋的我又係咁問：咁幾點有車呀? 搭幾耐呀? 搭十點船趕唔趕得切呀? 係唔係去到換到車票架?．．．就這樣買了九點半的頭等(送車票抵番)。
預計班車11:35開出，到達碼頭才10:45，便出碼頭呼吸一下再慢慢行過去客運站換車票，票務員告知10:55有車，她即時打電話出去問架車開左未，剛剛開出，下一班要成兩個鐘先有，票務員見我倆一臉焦急便對住電話問：叫唔叫到佢番黎，咁叫佢番黎。上到車只有我地兩個，開左陣到拱北又上了一批乘客。
一路上大部份時間都是行高速公路，路況良好，但一進入開平範圍開始落起雨來，場雨大到黑雨一樣，望出車外乜都睇唔到，還以為入左時光隧道，到客運站時雨才慢慢停，落車後第一時間去酒店。
酒店房間是阿蘇在ctrip網上訂的，入房一睇原來係套房，好大又有潭江景但江水有點混濁，坐左陣便出去食飯，問的士司機那裡較熱鬧便車我們到一處叫益華廣場的地方，到達後見到很冷清，找了間餐廳食拉麵。
食完麵找車去睇碉樓，找了架麵包車但司機話佢未去過自力村，有點靠唔住，還是打的，的士司機又係唔知，只好 call 上台問，去到自力村都成四點，問過這裡約花一小時，司機便話等埋我地。
一入村就有陣陣草青味吹過黎。
碉樓多是當時華僑出資建的，重點是保安，可見當時治安不佳。
有些碉樓可以上去睇的，但室內不可拍照，我倆就幾大都上去睇下，入到去保留了以前設備和日用品，睇到阿蘇不停說：我鄉下以前都係咁架。
碉樓外型有些中西合壁，是當年華僑把外國設計帶來的。
門票收入令這裡能保育，又可促進村民就業。
離開後上的士回到那個益華廣場，司機交低咭片話明日可以打俾佢用佢車，之後到了潭江邊走走，見到很多艇戶人家。
之後又到附近超市行行，超市很大有兩層，每層都有成個球場咁大，行到七點幾便去食晚飯。
留言列表
