Ray & So 遊記

旅程源於三個月前忽然間的決定，而這患得患失的三個月，忽然又過。
早上乘坐09:35航機，全機只有三十多人，起飛前空姐告知可安排後幾行較寬鬆的座位，坐低後告知要了解如何打開緊急出口，有需要時要幫手的，我只能答：希望唔駛啦！

個零鐘便到達三亞，出機場後找車往酒店，頭兩架嫌三亞灣近唔肯去，跟住搵左架要收五十，貴喎，這時聽到後面有對同路人去我們同一酒店，便跟他們夾車。
到左酒店check in，一時話未收拾好房間一時又話未有人退房，最後"嗡龜"我地去行政房，房間號碼"一生易死"。
入到房一見係透明浴室就頭痕，雖然而家好多酒店都採用這種設計，但我同阿蘇接受唔到囉，不過最後發現機關所在，放心晒。

酒店有隧道過沙灘的，但是日又天陰又大浪，沙灘上人影都冇隻。

跟住打車去食午飯，點了四角豆同文昌雞。

食完飯才兩點半，先到餐廳旁的臨春河睇睇，再到附近三亞河，沿三亞河向南走一陣便到步行橋。

印象中這條波浪形的步行橋在方中信主演的電視劇見過的。

行完步行橋才三點幾，原本今日只安排睇三亞灣日落，但見天陰陰唔太理想，便決定先去鹿回頭山頂公園，站在街頭等的士，唔知係唔係週末關係，等了又等，車多得很，但架架都有人的。
只好放棄鹿回頭回到三亞灣，搭唔到車唯有行路，行左陣便見那個人工島，再沿濱海路向北行，這段路好似叫椰夢長廊，沿路有椰樹有沙灘但就冇遮陰，走到那個海月廣場已經五點幾，心諗莫非天生辛苦命，人地黎三亞嘆世界的而我地就行到身水身汗。

一路上只見少數可供更衣沖身的設施，亦唔見有救生員。
跟阿蘇在這裡等日落，但三亞的太陽行得好慢。

睇完日落已經七點幾，是時候食晚飯，去了當地人推荐的飯店，那個羔蟹粉絲煲是一試難忘的。

食完飯少不免花點時間找車回酒店。